Bann rénioné la fine voir ali zwé dan in takon d-group. Walla, Soubik anparmi, po di rienk sa mèm. Li la aprann zwé gitar son tousèl, mé li la rant dann gran lékol mizik laba Paris, é li la pran kour èk bann gran zwar jazz. Jean-Pierre Joséphine l’amont le zoli koulèr mizikal loséan Indien, koman le jazz i pé danss fasilman èk maloya, séga, oubiensa koman li pran kor èk bann sonorité i trouv dan tout loséan Indien. Bref ! déza laba Paris, banna la dékouv Joséphine Group. Déza laba Paris, banna té forsé done azot in pri, po le gouté, le fruité, mizik-là. Demin soir, nana in bébèt konsèr i fo pa manké, si koté Palaxa, Sinn-Ni. Vin t’èr. Jozéfinn’ i pass èk tout son bann zwar, po in soiré jazz métisé. Nora in takon zinvité, li sar fé kado sirpriz.

Linpro konm in pro

Zot i doi konèt son bann zwar, bann mizisien mervéyé, gadianm, for. Bernard Permal a la bas, François Legros i zwé batri, Jean-Louis Léon èk son voi zénial, é biensir Jozéfinn’ èk son bann gitar. Ala, le group. Soman, kom dési lalbom ”Mascamad”, nora po aprésié èk bann danzéré mizisien, bann zinvité nou yèm voir dési sèn. Vèy pangar linprovizasion mounoir ! Prépar azot aprésié in moman mazik, i sar angant nout zorèy. Jaz aou, di tout. jazz azot dann Palaxa. Nou lé né èk sa mèm. Maloya, i tonm kom jazz, blues. Nana in zistoir i tir son lorizine dann lesklavaz. Bann zesklav té forsé inprovizé. Sinon, koman zot noré fé po aprésié la vi, anmaré kom zot téi lé ? Jozéfinn’ i vé pi èt anmaré, li vé zwé lib. Li lé lib. Li amèn la liberté dan nout mizik. Linprovizasion lé pa gatiré. Dési la partision, bann not i fé voiyaz, i dégom, i plonm, i doss, nout bann sonorité, nou lé abitié antann. Tienbo larg pa. Ala la mizik n’i vé antann. Alor, oubli pa. Palaxa, samdi 15 sèptanm, 20 èr. Nora Jozéfinn’, in randévou i fo sirtou manké, avan li sava zwé Madagascar, po in Madajazzcar bann i sar pa nioré.

Babou B’Jalah