Demin la pa dimansh ?
Sré pa gayar alé in tour an parti ?
Dan lé-o, sinonsa bord’mèr, ousansa ... akoz pa koté la rivièr ?

Dakor, mésoman adémié prépar tout depü asoir, po dékol demin granmatin avan bardjour i lèv ! Parss si moindreman vi ariv in pë tar : pü d’plass pou ou ! Kréol i grouy, Kréol i bouy : kisoi le kiosk, kisoi piédboi, kisoi le kap, tout lé pri, tout lé o-kü-pé ! Konmkidiré tout La Rényon la tonm dakor po kit la kaz, pou alé pran lèr, pou profit la liberté... Na in pë i vèy la plass depü bonër ; Na d’ot la fine amar zot bash rant troi piédboi an kak le tan i gat, parss kinm Kréol i èm la natür, lü ogard osi son mti konfor. Epüla i oubli pa non plü sak i soutien le kor : sétaki i amène ri-jone, rougay sosiss, ronm aranjé, kéfé koulé.

La, tout la famiy i artrouv ; é famiy La Rényon siouplé ! 15-20 persone o-moin, san konté bann marmay (sèd-la, pa moiyen konté, tèlman i kour partou). La, i koz, i manj, i kass lékui inn-é-l’ot, i rir, i bat kart, i fé klak domino... Ah, toudbon, na d’gou èt anparmi ! Pou inn koup de tan traka i fane, le sièl i klersi ; le kër, konm di l’kont, i arsanm in « kër d’solèy ».
Dimansh proshin, siplétadié, paré pou arkomanssé ! Parss pou bonpë Rényoné, alé an parti, sa in afèr i kont, sa in tradision... Kosa moin la pou di, la ? Sa in relijion.

“Le dimansh an parti”, Texte de Robert Gauvin, in "La Rényon dann kër", octobre 2007.

Lexique

An poundiak : en abondance
Anon fèr : bon appétit
Anpar : recueillir, accueillir
Ar ! : Dommage !
Bann : marqueur de pluriel
Bann (nom) : classe, génération
Bann (verbe) : rouspéter
Banna : ils, elles
Bébèt : fantôme, monstre, insecte
Bébèt : super, génial, géant
Béko : bisou
Bèl : gro