Zwazo la vi
La kas inn zèl.
Morso in moun
Dèrnyé térin

La rozwinn.
I fé souvnans tout in gabyé.
I ral fonnkër... kër malizé...
Dann mouswar la sosyété.
Bat drapo

Pli maloya
Si l’kor kabarizé.
Kabarsité !
Kiltir moulal
La sosyété...
Pa rényoné.

Zouké ! dolo vé zouké !
Moman là-ba la po pléré
Papa kozman pou garson maloyé.
Véli ! véli ! kilé ?
Kosa nana déyèr la mor ?
In syèl maloya ?
Lanfèr kolonyal ?
Fout pa pléré ... koman ?

Aswar, m’lé romé
Pa dann kèr-d’ronm.
Solman lamandoz santiman.
Dalon inn nasyon i lèv lö bra
Dann simtyèr rovandikasyon.

Baba dan la vi
É déza lër la fine vyé,
La fine bon pou alé.
In souvnans pou in Loran,
Mémwar-nwar pou in Zan,
É mtèt byin la mor
Po in domin dann kalou.
La-Rényon... La-Rényon lé konm fou.

Wi ! Wi ! nout péi dann kër
Lé an kornis boutéyé
Klaksone an raz-do-dan
(in zarlor i par solman)
E kozman mon péi
Lé foutan. Pwin la vi.
Non ! agard
Agard bann kolonizé
Erémi po kontanté
Franksyonër dann batar la sosyété.
I bat in kréol atèr
I mèt fransé an bèrso dann kër.

É bann dalon vanzër k’i larg lö kor
Dann simtyèr rovandikasyon.
Oté ! mon péi La-Rényon
Fé pa sa... fé pa sa... non.
Dan out min, fé pa k’lé mor pou aryin.

Done pa bann koson kolonyal
Nout gayar morso-d’pin
An zouklov anfoupamal.
Inn pay la mizik k’ou foupamal
Tir konm gro kalité zamal.
Mé dan out kër
Gadyanm lö pli pir, maloya vo aryin
Fonnkézèr dann park syin.

Fé souvnans pou in gabyé
Réyoné syouplé !
Dvan l’kor kabarizé
D’nout kiltir, d’noutlidantité.

« Pou Papa, pou Moman,
la antèr amwin
dann zot kër.
Mi minn la vi kabarizé
Pou in domin kontanté dann sosyété réyoné »

21 janvier 2001
Babou B’Jalah