Zot faire ce ki zot kontan nou pou la encore pendant tres longtan, Faire ce ki zot kontan nou pou encore la pendant tres longtan

Nou ban marrons ca letemps moderne, Ca letemps moderne bizin dan marronage
Marronage contre l’esclavage, Contre l’esclavage moderne sel solution marronage

Depi lépok hollandais, après vine period francais ek period anglais, ziska zordi
dan nou péi fine ena boucoup changement.
Mais changement lors changement. Pou ki tout reste pareil.
Pas fine ena abolition et encore mois ène compensation
L’independence an illusion ki garde nou dan ène vision
Esklav ène constitution.

Nou ban marrons ca letemps moderne, Ca letemps moderne bizin dan marronage
Marronage contre l’esclavage. Contre l’esclavage moderne sel solution marronage

Colon remplacer par colonialiste ek colonialiste par linzistis
Bourreau par la police pou garde nou derrière barreau
Nou la croix pé vine plis lourd Chaque fois ki zot zouer nou enkor ène mauvais tour

Mazik zot faire are nou ek son ban consequence trazik
La mizik ca nou mistik pou nou denonce linzistis
Faire nou croire nou pas narien kan nou connais nou ban humain
Nou ban marrons ca letemps moderne, Ca letemps moderne bizin dan marronage

Nou ena nou prope filosophy nou ek nou prope kaligraphy
Nou ban marrons ki aporte un lespoir dans ca trou noir
Nou change l’histoire kan zot nek faire un tas zistoire
Fair nou pass pou bouffon ek rode envlope nou dan un tas chiffon
Nou ban marrons ca letemps moderne, Ca letemps moderne bizin dan marronage

Depi dan bilo faire nou croire ki nou ban lalo
Zot zero garde nou loin are zot ban biro
Pou fini par boulo dan karo, lors dilo ou faire macro
Zot faire un tas nimero pou zot contigné roule dan gros loto
Boulo dodo boulo dodo boulo dodo zot faire vine nou motto
Nou ban marrons ca letemps moderne, Ca letemps moderne bizin dan marronage
Marronage contre l’esclavage. Contre l’esclavage moderne sel solution marronage

Antigone, Barbe Blanche, César, Diamamou, Espérance, ca nou ban hero
Lors chaque lettre alphabet éna un latete
Nou ban victore gagne cachiete dan l’histoire pou ki nou reste dan noir
Nou fière 18 Juin 1695, un grand victoire ek nou la gloire
Dan zot défaite nou gagne dénomer ban mulot
Nou ban marrons bien avant ca letemps la
Marronage kont l’esclavage

Nou ban marrons ca letemps moderne
Ca letemps moderne bizin dan marronage
Marronage contre l’esclavage
Contre l’esclavage moderne sel solution marronage

Daniel Assame
2008-03-13