Napoin lontan ankor
nou té pé voir dann Por
inn ti bourik travérss la vil /
gramoun Turpin in bon vié yol
té propriyétèr le karyol /
pou zot dë, la vi té pa fasil

dëpi boner, nout vie bourik
i aspér kliyan d’van la boutik

marmay lékol i pass terla
pou ni rod makatia solda /
i miz azot ral si son kë
profite Turpin trann kal miské /

tanto avan lér la bèrlok
tanto konpér shinoi i anvoy
Turpin èk son bourik sharoy
bal de ri ék bal de sïk dann dok /
oubyin ranpli détroi bonbone
bondië kréol dann dépo-d rom

dézér avan li komanss travay
konpér shinoi i ronf si la pay :
asoir la pèy lé sïr lé byin fay !
zordi pou fé zot komisyon
kliyan i préfèr pran kamiyon
sharét bourik la pèrd son fion

« oté Turpin, borde ton karyol
argard transpor la métropol »

dëvan kou-d shabouk-la
napoin parad
in békèrdklé
napoin kamarad

pa vré Turpin ?

Extraits de “Pipit marmay Le Port”, de Patrice Treuthardt, illustré par Teresa Small, édition Ville du Port.