Térla mèm moin l’aprann joué foutbol ék in takon jouar-védét !
Avèk Guifo, le garson Sanpresé, in gran foutbolèr Jeanne d’Arc dann zané 50. Kan ou regard Guifo kan li marsh, ou konpran poukoué té apèl son papa kômsa ! Zot i voi par zot-mèm koman bon fimié i fé pouss toujour joli piédboi, kan lépa joli pié foutbolèr-mèm...

Dann la rïyel-la, lavé in not zafér té féros : té lo bann tinét. Dann tan-la, kabiné té dann palisad-la kour, avék inn ti fénét déor, dann bordaz-shëmin, pou lès bann kondané ranplass le bann tinét kan lété plin. Souvandéfoi lë tinèt té débord é di pa si lo bann plansh té désèrklé ou sinonsa nout balon foutbol té fé èsploz lë tinèt akoz lë ti porte an boi té fine pouri ! Aborla, lapa la pèn mi èsplik azot astér, poukoué té apél nout térin-foutbol, la rïyèl Kaka...

Na in bonpé jouèr-foutbol Larényon la guingn inn tinon gaté, sa la suiv azot partou ziska la mor, sa la suiv azot partou ziska le por ! Dann tan Sanprésé, ou lavé Kasanfér, Patantol, Krik, Karoutshou, La flèm, Volay, Mambo, Grantèt, Baguèt, Papay (boug-la té tèlman gran, li té guingn kass papay san golèt)...
Aprésa, dann lékip Lé Mov, ou lavé Tipis, Tikanot, Tilofo, Tétkuiv, Mingo, Tizié... San konté le bann véyèr-lakok !
Moin-mêm, toute dëmoun té i kri amoin Trétar é mi rapèl byin lë jour in siportèr Saint-Joseph lavé di amoin avan in mash L’Excelsior kont La Patriote : « azot, zot nana Trétar, anou, nou nana Troto (té lë tinon zot jouèr kalédonyin Nikotroto) »

Lecture choisie :

Kafrine

Rest la kaz kafrine
Déor la pa bon
Lavi ou mazine
Lavi set eine chanson
Lès amwin alé oté
Mwin nana kouraz
Lès amwin alé mon koté
Konmsi mwin ton garson

Dépi sétan, mi sava lékol
Ma rod in travay,
Pran mon partikulié
In bon fanm kréol, i sa pa lékol
I okup son ménaz é li pas balé

A sézan mi kour, apré lamour
Pou fé le bonèr mon konpanyon
Talèr dan nef moi, ton vent déjà ron
Ton joli kèr la fine alé maron

Moin nana vintan, mi vé pran lavyon
War an métropol kwék sé zot fason
Ton péi La Rényon,
Ton papa, ton monmon
Demin lé sur ta oubli ton nasyon

Vollard Combo : “Kafrine” extrait du CD Séga Tranblad