Lané dernière, lèr lavé fé konèt kisa lavé gagne le konkour Lankréol 2007, pa tout domoun lavé konpri lo konkour té ropran pou sèt ané. Rienk moi d’mé-juin par là, la rofé in lanons, porézon na poin si tan tèlman domoun la rant dann konkour lankréol s’kou si : in douzène nouvèl solman larivé.

In pli gran konkour

Zarboutan nout kiltir Danièl Honoré la bien insisté ièr : lo konkour i kontinié é anpliskesa, riskap li sa pran in gran dimansion akoz La Région la déside mèt lo paké lané proshène. Fo suiv. An tou ka, tout domoun i èm ékri kréol i gagne komans mazine zot zistoir.
Nicolas Séry i gagnera pa partisipé an 2009 akoz li la gagné sèt ané, véy dérièr li lavé osi gagné an 2007, é an 2008, li té dann juri. Son nouvèl “Lo zié gran rouvèr” la pass loin dovan, akoz lo stil la fane tout sak té dann juri. Sé in zistoir nou la pokor lir, alor nou va rant dedan avann alé koz èk lotèr épi na partaz sa sanm bann léktèr “Témoignages” dék sar posib. Monique Merabet la gagne in mansion espésial pou in tèks èl la lir dann konférans de près.
Plis an plis domoun pou lir
Plis an plis osi pou ékrir

Daniel Honoré la koz ièr dési lo gro demande néna koté bann domoun i lir kréol pou trouv bann tèks gabié, sirtou néna bann zélèv i suiv bann kour LCR, épi sat i sa liniversité i travay dési nout litératir. Bann tèks lankréol i amont bann zékrivèr koméla i soubat pi ansanm lidantité, zot i rant dan bann tèm pli larz, zis pou lo plézir ékrir zot lang, rakont in zistoir avan tou i fé mazine anou inn ot linivèr : sat lo rèv, sat lamour... sat la vi va di Nicolas Séry. Dan son zistoir, lo personaz i trouv in linète la mazi, kosa li sa fé sanm sa ? In kestion i vé dir : kosa ni fé ansanm nout vi ?

Francky Lauret