Patrice Treuthardt, in fonnékzèr, i prézant pi, tèlman la fine voir ali dann ron. Kisasa i koné bann gayar sanson Ziskakan ali mèm la ékri. Patrice Treuthardt la fine done konpliman po in K, i pointe po larg konplint dé Galé, kom kozman maloya dann kabar La-Rénion.
Alala li invit anou batkaré dann souvnans son tanmti. Ali marmay le Por. "Pipit Marmay Le Port - Carnet d’enfance", le liv Patrice Treuthardt, i rakont la vil le Por, selon mazinasion in poèt le por, la zwé balon dann Por. Li rapèl, la riyèl kaka, le zour linogirasion stadolinpik, le roi-poker, ti lékol Manmzèl Dérimer, le bazar le Por, le soir zéleksion Mondon kont Gonthier.
Si zot i koné Patrice, zot va lir liv-là èk lanvi konèt ali plis. Si zot i koné pa Patrice Treuthardt, kosa zot i atann po lir - kosa mi di, po anval - zistoir in marmay le Por i vienbou pa sanpass son ti vil ousa li lé né, épisa Linn, son péi mazinasion bondié. Oté, kan zot la tourn bann paz là, oubli pa ogard bien bann zimaz, bann foto, bann gayar désin Térésa Small. I vann kinz éro. Kour vit alé trapé.

Bbj

La Bït Sitronel

Mi lèv arpa dann péi la pèr
Mi rèv an kroi dann bra la mèr
Mi dor arpa dann dra la mor
Ma arlèv la dann péi lë Por

Moin lé né Sinpir
Moin la grandi La Bït Sitronèl
Lë Por mi koné sa par kèr
Par Kèrségnan ziska Titan

Moin lapa boir lank
Moin la boir d’lo la fontèn Titan
Mèr mi mazine amoin si lë ké
Bèl larm la mèr i roul dann fon mon zié

In zour si mi mor
Antèr amoin simétir Lë Por
La rasine la mèr va monté
Va nétoiy mon kor èk dë lo-d sèl

Moin lé né Sinpir
Moin la grandi La Bït Sitronèl
Lë Por mi koné sa par kèr
Par Kèrségnan ziska Titan

Mi viv dann in vil
Nana la mèr i rèt, i dor an luil
Dann bor son kor dann fon mon kèr
Ansanm-ansanm nout dë li kosté

In zour si mi mor
Antèr amoin simétir la pès
Té dalon, suiv amoin dann Por
M’arlèv dëboute La Bït Sitronèl

Amoin-mèm marmay Lë Por
Mi koné kisa mon bor
Souvnir moin nana dann fon Titan
Moin nana pou rakont pandan lontan

Patrice Treuthardt