Lakey lo sit > Culture > Ki kré Kraké, Sat i kré fé pété
“Po désovaz anou in pé”
In pti poèm
vandrodi 30 mars 2007
Toultan, mi pass aznou devan le foto
Le gran sèf bann sèf blan
I asir dann biro
Laba an frans
(Ah ! La Frans, La Frans, La Frans ...)
Mi prièr ali konm i fo :
Oté, sèf blan, akoz ti pran pa konpassion ? Akoz dan la sèrvèl i ranpli ton kalbas bien vèrni, i arèt pa in mti lidé po ton Zanfan i rès loin ? Ankor si nout zié té pli gran k nout vant : alé oir kosa ni vé ?
Ni vé médikaman
Po éklèrsi
Nout po
Episa in nafèr pou fé ni solèy moin so
Pouk li arèt noirsi
Zanfan mon momon
Anvoy osi (sak ou’a gingné sar bon)
Kidèf-biolis
Po dévis
Mon vié sové boulon
Anvoy ankor de moun kapab désovaz anou in pé : in amontrèr pa manz èk la min, pa manz dann fèy fig, pa boir de vin tamasa. In amontrèr manz kari o pin.
Ni vé pi boir la rak o vèy
Ni bat pi kart koté lo kor
Depi zordi, na fé parèy
Demoun déor
La pèrd somèy
Devan la mor.
Et vous serez aussi très bien aimab
De nous en envoyer
Des gensses konvenab
Qui causent le français
Pour que Axel gauvin, il en est moin chauvage. (1979-romans po détak la lang, démay le kèr)
Axel Gauvin