Oté, koman nou la gingn pass à koté, san fé in kont ! Té falé trouv lokazion po aranz lafèr. Alain Péters la kit anou le 12 zilié 2005. I fé trèz an li vavang dann sosiété vant anlèr. Alala, le boug i komans gingn la rekonésanss. Sétaki la fagot in léspass i port son non po èd bann kloshar, sétaki la invant in pri Alain Péters. Rozman, nana bonpé astèr i gingn pi anpasé son mizik, son fonnkèr !
Alain Péters, bonpé va dir, sé in lartiss la tonm dann shemin. Akoz ? Lété sirman in lartiss la trouv shemin. Biensir, navé lalkol, porézon son lam an doz. Péters té in poèt té rod pa fé le fion, té in parabolèr navé in kozman po dir kosa nana derièr le kèr in bononm. Banna i di maloya, sé in mizik po rakont la mizèr, le tan lontan, lésklavaz, la koloni, le bann kolonial, et le pë d-kolonizé. Péters la amont in’ot kalité maloya. Sat là i rakont zistoir in moun la po défil son vi, son bann dézespoir, son manièr voir son péi. Non va ! té pa sèlman in lanj lavé pèrd in zèl. Alé, dizon té in pov diab la gingn in zèl ansanm koudkongn la vi. Viv an sosiété lé pa toultan bon po la santé. Bon, sèt ané la kass an pay. Nora rienk Sakifo va mèt lonèr an plass, èk son dézièm pri Alain Péters. Si lané dernièr, sé le prins la gagné, Sin-Péters tash manièr fé sak i fo po tout bann ti valé.

 Bbj