Sa sé po in Tikok Fonnkézèr. Toultan, mi fagot in plass po in porsion tèks lékrivin là. « Zistwar Tikok, Listoir Tikok » par Kristyan Fontinn. Kisa i koné vréman tout son sobat, son sobatkoz, son trasé la vi. Olèrk larg in tèks po lir, ogard tout son zarlor.

Kaross, in tèr maron, la vi énèt in garson lo 23 novanm 1944, uitièm zanfan anparmi douz Klodomir èk Ivone Fontinn la gonn. Lo pèp margoz, in zanfan i vé rant prèt. Vèr laz onz an, li sava séminèr Silaos. Aprésa, li sava Tananarive po pass son bak dann kolèz Sin-Misèl. Aprésa, li étidi la filozofi èk la téolozi, Angers, Bayonne, laba an Frans. 1972, li lé ordoné prèt dann légliz Sin-Zozèf. 1974, li travay èk bann prèt Sin-Pièr, soman son kèr i mazine touzour so pèp margoz. Li mèt la min, li sobat, po in rokonésans politik, kiltirèl, ékonomik, po bann rénioné. Li mèt ansanm lo PCR. Li gard kap dann Témoignage Chrétien de La Réunion. Sé la bann rénioné i komanss lir « Zistwar Tikok ». Li pass par CDPS, Centre pour le développement et la promotion sociale, po èd bann plantèr sirtou. Li fé mont détroi zasosiasion, bann kopérativ. Li rant osi dann Radio Pikan. Son bann zistwar Tikok li débark si bann zond. Lo 10 avril 1984, li fé in tanponaz. Lo 30 avril, li mor.

In lègzanp po bann rénioné

Tout sat la koni ali, i souvien koman li té mèn la vi. Sinp sinp, konm tout demoun, angazé soman. Dan in fonnkèr Dédé Lansor la ékri, ni lir « prèt rouz, prèt maloya, prèt néna fanm, prèt lèskandal, parkoman don ! in prèt : in moun ». Dawar... non la pa dawar. Sirman, son vi in lègzanp po tout bann rénioné, konm Danièl Tévanin Saïngany lo ékri. Oté, banna, la lit la pa fini. Nout lang lé touzour malizé, nout kitlir touzour margonyé. Nout vi an margoz. La sosiété i ral anou sou deri. N’onkor po sobat. Ziska lèr, ou mont anou, i fo tienbo lansor, tienbo lo rin. Batbat maloya, koz aou fonnkèr, mars èk pano dann somin, La Rényon i avans tilanp tilanp. Lo pèp i trèn touzour son pat po suiv la kadanss. Ou la mont anou sobat, kozé, vanzé.
Dann lémision « Kriké kabaré » si radio Pikan, sou lo non Manièl Robiné, li rakont kosa i lé « Zistoir Tikok, Listoir Tikok ». Manièl Robiné, Kristyan Fontinn, mèm moun. Son liv in porsion li minm, in porsion son mazinasion. Soman, li di bien « sé in fason po lo boug i ékri, prézant in sertin nonm poinnvi, in sertin nonm mars-asuiv, in sertin nonm valèr ». « Zistoir Tikok, Listoir Tikok » sé tout in patrimoine, dawar la po palank dann loubli. Li di lé parapor in milié « tiblan », soman ni voi bien sé tout La-Rényon i rosor dan son liv. Plizir kou, liv-là la sorti, CDPS, mé astèr sé lantant Mèt Ansanm i okip fé sort so bann zistoir. Zis po dir, i pé trouvé dan bann libréri, otroman di bann farfarliv. Alé rodé.

Babou B’Jalah