Lir sa ...

Romans po détak la lang

19 octob 2007

Oté, oté kamarad !
Prèt inpé la min
Done inpé la min
Ed domoun inpé

Po détak la bous
Po koup filé
Po démay la lang
Po dèf kozman

Sinkant préfé i asir desi mon lang
Mil amontrèr i tap
Kou d règ an fèr desi mon lang
Troi san z’an sabouk i fé singn mon lang

Alor si lame i sap par bout po zanfan maléré
Bous out bous !
Lo pléré po la vi, lo rir po la mor
Bous out bous !
Sréti kozman féklèr
Bous out bous !

Di pa
Di pa
Di pa

Sansa koz parèy trébinal
Koz parèy zandarm
Koz parèy la loi
Koz po ton frèr langaz
I arsanm la gli zangi

Oté kamarad
Moin l’apo rod dé mo
La Pa démo mo gaté konm le mo :
 « larzan n lo »
 La pa dé mo flétri
La pa dé mo frizé
La pa dé mo koulé
La pa dé mo moizi

La pa dé mo i tonm féblès
Dé mo tanbav
Dé mo lanpa
Dé mo invalid
Dé mo lazèl koupé
Dé mo inhya-kosa-ou’a-fé !
Dé mo done-koka-m’a-vot-po-ou
Dé mo la frod
Dé mo pardon-madam-sa-la-sapé

Non va,
Anprèt amoin dé mo zoli konm foulsapat
I san bardzour i san léspoir
Dé mo i klok konm zavoka-péi-gran-kolé
Bien fré parèy fanzan kapulèr

Anprèt amoin dé mo i mars
I kour
I lof
Dé mo fité konm torti
Ostiné konm zoumine,
I tienbo séktèr
Konm kanot bor d mèr
Dé mo pti-kou-pti-kou-san-sès
Parèy karya dann sato an boi

Episa dé mo i frol dou
Dé mo i karès
Dé mo lamour !

Soman obli pa
Dé mo i sougorz, i dépotol,
I kapot, i défons, i kraz,
Akoz moin sar blizé sougorzé, dépotolé,
Kapoté, défonsé, krazé.

Gauvin A. : “Romans po détak la lang”
in Romans po détak la lang, démay le ker , Editions Presses de Développement, Saint-Leu,1983, pp.35-38.

Signaler un contenu

Inn modékri, inn ti lavi, inn komantèr ?

Témoignages - 82e année

+ Lus


2026 Témoignages