Merkredi 7, 8èr d’soir dan la Kour Mao (Sinlé) lavé in konsèr sanm Shakwat, in group fonkézër (ansanm funnkézër, talèr na war akoz) i mèt zot tèks an mizik. Dan group-la néna Vigile Hoareau ; sé li la form le group, i ékri bann tèks é li zoué, li shant. Néna osi Jimmy Létang-Sale é Loran Thien-Chow-Kan, troi marmay le Sïd ; lontan zot group té i apèl Sèksion 480 - a koz in pé té i sort Sin Josèf -zot té i fé Rap, èk le kontèr Sergio Grondin. Vigile Hoareau sé in militan la lang kréol, dan Lofiss la lang. I sar fé lankèt pou Lofiss, pou donn in koud’min pou mèt an lèr la grafi kréol réyoné. Loran i zoué osi an duo avèk Iafare-Gangama ; Jimmy sé in mïzisien i zoué èk Ziskakan, VerZonnRoot, Yaèl Trulès ; li la zoué èk Hil, é avan sa té i zoué èk Ousanousava. Sé in zènn marmay néna in bon lespérians. Zot romans reggae i rakont bann zistoir lévolisyon La Rényon la konèt sé vin-trant dernié zané.
Le Funnkézër zot la fé merkredi, sé in afèr pou fé ri la boush èk lo kër. I di “Fun” pou amizé, pou lo Funk osi (dan la vènn zané 70-80), in pé prosh bann mizisien Soul. An mèm tan, demoun i antann “fonnkézër” komm nou konpran La Rényon. « Sé in poézi an mizik, i toush demoun é i remèt azot anndan » Iafare-Gangama la di Témoiniaz.

Zot i arkomans mardi 20, 6èr 1/2 lo soir, Salle Canter Sinni : Shakwat i rouv lo ron funnkézër èk inn-dé dalon, pou sak i vë rant anndan. Nora in sïrpriz avan rant dan la sal. Aprésa Iafare-Gangama èk Loran i sar rant dann ron, ansanm lo kontèr Beurty Dubard.

Par kote lantant tikouti...

Tikouti, sa in lantant demoun i fé pa rienk lédition - ékri-kozé po marmay lékol. In zour, nou va koz dessï zot laktivité zénéral. Mé zordi, Paz kréol i prézant azot in tralé liv èk diks Tikouti la préparé. Lé disponib ladrès Lantant, 38 rue de la Baie, 97460 Saint-Paul, Ile de La Réunion (www.tikouti.net).