Zot va dir amoin « ankor sobatkoz-là ? ». Nout lang la pa mor, ou di amoin. Ou kroi ? Ou di sa akoz ou antann demoun i ésèy koz kréol. Ou mazine nout lang la pa bézoin sovtaz. Oukilé alor, in gayar plass po nout Lang ? Okilé Nout Lang Kréol ? Nou nana in zournal télé an kréol. Tanka Témoignages, pèrsone i pé di li fé pa son travay. Dépi lontan, nou mont lègzanp. Détroi marmay i aprann kréol lékol. Soman nana ankor po fé.
Mazine azot in fonnkézèr. Li èm di fonnkèr, dann ron kabar, oubiensa dann shemin, pli méyèr si podiom. Soman, kom tout bann moun i ékri, fonnkézèr i èm voir son liv sort in kou, énèt an bon favèr. Demoun i lir, demoun i arlir. Ni mèt si lintèrnèt, nou pé kol ali si in mir. Soman, fonnkézèr i èm son ti liv fonnkèr. Inposib ! pa kapab lé mor san éséyé. In léditèr va di aou « Non, bann liv an kréol i vann pa ». Konbienn moun i di aou sa ?
Koméla, nana in bonpé in préfèr anvoy zot fonnkèr an fransé, akoz lé pli fasil trouv in léditèr, vann zot liv. oté, fonnékzèr i ékri pa kréol, po vann. Li ékri akoz na poin in ta i ékri kréol. E po fé viv la lang, odrémié travay po kréol, nout lang. Kisa i di ankor, nout lang la bézoin sovtaz ?. in lang i ékri pa, i mor. N’inpé i di lapa vré. Dépi dann tan lesklavaz kréol i koz kréol. Kisa la ékri ? nana bonpé ? Kisa la amont sa lékol ? nana bonpé ? Ala pokosa nana demoun i lir pa kréol. Demoun afors la oublié, la pèrd le mo. E nana in takon le mo nout vokabïlèr la pèrd la trass, akoz demoun téi di pi. Rod pokosa n’inpé i di nout kréol rénioné, sé in fransé mal kozé. Anpliskesa, plis i avans, nana le mo i rant mèm dan nout manièr kozé. Olèrk aranz nout lang, ékip nout lang, tienbo son gayar mo, nou ramass mèm sat i sort péi déor. Nana in tralé le mo i gingn di nout santiman rénioné. Rodé, lir, aprann, di, koz ali, nout lang kréol i mor ar’pa.

Bbj

Mounoir ! po sov nout lang, azot osi i gingn done la min. trap zot stilo, anvoy anou zot tèks, zot mazinasion, zot fonnkèr, zot roman, zot blag, ékri an kréol. Tou lé vandredi, na mèt dann nout paz kréol.