Kréol i yinm donn domoun ti non gaté. Po prèv, dann lékol Tikok, tout marmay na sakinn son ti non : na inn i apèl Rober Sanpyé, lot Popol Nidpoul, lot ankor Titwane Légri, na ziska inn tout marmay i kri ali : Ani Sikodpip !
Tikok li, son vré non sé Émilien Biganbé, mé pokwé i apèl ali Tikok ? Sé pars étannti, li té yinm batay bonpé lékol. Té falé pa in mous té poz si li ! Li té siport pa sirtou lèr in pli gran té anprofit si in pli ti. Sak rékréasion, si navé in batay par la, wi pé konté : Émilien té la ! Osi in zour, la métrès lékol la mèt si karnédnot "élève travailleur, mais aussi : petit coq batailleur !" La métrès la lir for dovan tout la klas. Tout marmay la rir. Po saminm, dopi zour-la, tout-la-bann i kri Emilien "Tikok".

Dans "Zistwar Tikok, Listwar Tikok", de Christian Fontaine, édité par le CDPS en mars 1988.