Granmatin kafé la po koulé, in martin i ékout zournal radio.

« La sité Bélié, ankor in matapanaz ladilafé. In mal la vol madam intèl. La mari zalou la atann ali dérièr in bransh, po mat ali. Le gob té paré dépi lontan. Le kriminèl la vir an kaz »

« Ala ! ankor in ot la pèrd la boul. Ala ousa la l’amèn ali ? An kaz » i di martin.

In moino i antann le kozman le martin, li di « é ou ! la pa ou po kozé. Ou la tèlman batt la lang, banna l’anmar aou. Anzolé po kozé, olèrk konm moin vol an liberté ».
Li té pokor fini son kozman, in shat, sat madam Tonton, sèd pass an flèsh, gob le moino.

« Ou vol ar’pi loin », i ar’di martin.

Moukay pa sitiasion out voizin.

Babou B’Jalah