Navé in foi in pti shomin. Pti shomin-la téi apèl..téi apèl pa. Li lavé poin lo non.
Tou lé zour domoun téi pas, téi arpas dosi li, téi kraz ali, téi flank koudpié minm dann son tèt.
Gran-matin , kan lo zour téi klèr, lété gramoun Frédéa. Li bit dann galé akoz son zié lé p’ ankor bien rouvèr. I sava la mès, li la !
Aprésa lété bann travayèr ansanm zot sak si zot do. Aprésa ankor, té lo tour bann marmay lékol. Banna i ravaz, mi di azot ! Pti shomin lé fatigé avèk zot. Lo soir, zot i ravaz plis ankor ke granmatin.
Sak li téi inm sé kan bann zamouré téi vien lo soir pou kozé si bordaz shomin. Té gayar oui,antann azot. Lo pti fy téi san bon, lo garson té in pé gosh-gosh.
Pti shomin i di dann son kèr : ma bien ékout azot, ma bien ramas sak zot i di. Konm sa, in zour, si mi trouv in pti madam shomin pouf é mon vi sanm èl , ma konèt koman i koz ansanm in madam.
Ala pti shomin lé tris minm. Li kalkil, li la poin in non pou li donn son madam.
Li di : « Mi vé in non. La pa in gran non, konm sèt mon kouzin la giny in non zénéral larmé ; mi vé zis in pti non konm Shomin-la-dousèr , sansa shomin dolo dobout-mi pas dann karo kann »
In zour, travayèr la komine larivé, la koup tout kann bordaz shomin. Lo mèr la vni , li la fé in diskour, lorkès la fé la mizik.
Lo mèr la batiz ali : « Ancien Sentier de cannes »
La pti shomin té kontan, la : li la ginye in non, in non i sort déor, in non an fransé siouplé.
Lo tan la pasé. Landroi la dévlopé. Lo kartié la vni in vil. In zour la goudronn atèr. Marmay téi zoué glisé dosi son do.
Sak lété pli gayar sé kan la apèl ali, boulvar « des grandes armées et des grands hommes d’état ». La fé la fèt ! domoun la mèt zot gayar linz. La mizik la zoué ankor in kou. Aprésa tout bann nuit téi alime la limièr. Loto téi pas inn déyèr lot, nuit konm zour.
An pliské sa, tazantan, bann travayèr téi vien, téi i rash bann plak goudron épi téi mèt in koush pli lour ankor ! Ala i fouye son kot !Ala i travay la nuit pou pa pèrd lo tan la zourné. Pou son par, li na pi lotan pou dormi, kansréti fèrm in kou son zié pou ropozé.
Ala pti shomin i sèye dormi, li ginye pi. Ala pti shomin i ginye pi ropozé. Li lé pi kontan ditou. Li vé artourn konm dann tan lontan, dann tan téi fé pa in kont sanm li,dann tan marmay téi zoué balon si son do, dann tan gramoun Frédéa, dann tan li té in pti santié dann kann.

Soukhéina Badat