Zétoil maloya la pa loin tinn limièr. Koméla, si zot i regard bien, sat i marsh, sat demoun i yèm ékouté, sé maloya aranzé. Sétaki i "aranz" ali èk rock, blues, jazz é konsor. Naki préfèr ali pir pork, san poursan tradisionèl. Akoz ? Maloya tradisionèl i atir pi demoun ? Zot va di amoin la pa vré sa. Oté, kan maloya All Star i prépar in bon spèktak, po amont bann gran maloyèr, nana rienk 28 rénioné i rézèrv biyé. Stéphane Grondin, prézidan Maloya All Star, i analiz la sitiasion kom in mank latansion. Dawar demoun, bann rénioné, i èm pi maloya lontan, i préfèr ali aranzé. Mé, sa maloya pouvréman, sa ? « Zot i èm kan na rougay sosiss, deronm, devin. Mé kan sé in spèktak sur la sèn, na pi pèrsone. Dawar osi, nou lé pi d’aktialité. Antouka, plis nou sava, le maloya tradisionèl na pi de piblik. Oubiensa dawar, le piblik lé pi tro amouré, somanké ? » Stéphane Grondin i fé remarké. Poitan, Maloya All Star téi prézant bann zarlor, bann maloyèr bandé, for mèm. Nono shantèr Kiltir, Olivier Araste po Lindigo, Thomas le group Mélanz Nasyon, Gramoun Sello, anparmi d’ot gabié shantèr maloya. Oté, akoz demoun la larg le kor, don ! N’inpé i yèm maloya défoulaz. Soman, kansa va pran konsians tout sat nana dérièr le maloya, son zistoir, son bann zinstriman, le bann vré non le bann zinstriman. Sokouy kavia, batt gro tanbour, takine bob ! Maloya All Star, nana in rol, nana in volonté : fé prann konsianss demoun la rishèss nout mizik lontan, kan demoun té kri maloya, kabaré.

 Bbj