“Flo”

N’in romans po kadans
Dann kanotman mon lam
An balotman la mèr
N’in romans po fiyans
An maloyans mi yinm
Out dolortman lamour

Aou dann out zénèzté pomé
Amwin sanm mon vyéyèzté frizé

Dann vyé marmit mon kèr
Ma kari pli méyèr
Rak out lang an kiyèr
Vir mon lam anlanvèr

Dann vyé fèy fig mon kèr
Ma moultani in bonèr
Pas lardèr flanm out zyé
Po li défarlangé

Dann vyé soubik mon kèr
Fé bwar amwin dolo bandèz
Anmar amwin dann bèr

Kinm pi kab an kapor
Ma anbwa mon bann mo
Madsoka korbèydor
Konman brèz dann karo

Mo kodinn zékli lo syèl
Wa pitak aou monmzèl
Apré zèt mon vyé kor
Zétwal filant la mor

Danyèl Waro (1998)

“Fanm sï fanm”

refrin :
Fanm !
Tèlman plï tann !
La mann !

Fanm !
Tann an bon kër !
Doussër !

Fanm !
Tann an rozé !
V’alé !

Fanm !
Tèlman plï dou !
Kalou !

Plï kalou
K’in vilin kalou !

Kouplé 1 :
Fasson ou i guèt l’ot pti manmzèl
Na pou paryé out kër i lanse
I danse
I débate, i shante, i kadanse
Fasson ou l’apo plonm aèl

Manièr èl la pou louk aou
Na pou paryé son kër i vir -

- dévir.
I dévir, i shante, i shavir
Manir èl i‘garde aou dou. (refrin)

Kouplé 2 :
Pran in kër mon zoli fardé
La zour d’zordi dë pti zaza
Kaba
I yèm inn é l’ot, néna le droi
Tienbo le kou, békote, béké.

Pou guingn in zour zoué la maline,
Néna le droi pèsh inn é l’ot
A kote.
Pou bate in karé Brakanote.
Pou guign in tour fé filipine. (refrin)

Kouplé 3 :
Moulïr kontr moulïr. Far sï far.
Lèv roz dessï lèv rouz. Tété Dressé
I rédi dvan tété maté,
I fronte gadianm pou guingn gayar.

Tantine dessî tantine, fanm sï fanm.
La lïne dessï, la lïne dessou
In kou !
Vélour konte vélour la falou
San fé la pair, po rienk l’anm ! (refrin)

Kouplé 4 :
Ou na rézon pa yèm le zonm
Ou na rézon pa yèm le mal
Brïtal !
Bourik i kroir lï-minm shoval.
Bann matador ! Malang ! Mazonm !

Karès pa karo pikan blan
Anbrase pa piédkou groloulou
Pa dou !
Fé kour karté tout bann koulou !
Préfèr pîto in bon, in fran... (refrin)

Axel Gauvin