« Mesdames et Messieurs,
Marmay
Zot tout isi rasanblé
Bonjour Azot !

Sé toujour in plézir pou moin dèt isi ansanm’ zot ! An mon non, é an selui du konsey départmantal, mi remersié pou linvitasion « M. le Président, M. le directeur, membres du CCEE et la Région. »

FÉLISITASION à tout bann Marmay isi prézan, é osi BRAVO é in gran Remersiman pou bann lamontrëz é lamontrër ke la akonpagn azot dan se Gayar lavantur.

Zot la fé plïs ke partisip in konkour : zot la pran zot PAR pou fé viv nout kozé, nout lang, nout kiltir, nout mémoir. Kan zot i désid dékri an kréol, zot i fé plïs kin sinp ti jest : zot jest lé For, lé Bèl, i pran Sans’. Zot i mont ke la lang kréol lé pa in lang sëlman pou koz tou sël, mé osi in lang pou rakonté, pou transmèt, pou révé.

Avek zot bann teks, zot la mèt anlèr nout Vi, nout limajinasion, nout sourir, mé osi nout doulër, nout Zistoir, nout lespoir.

Zot i amont anou ke la kiltir la Rényon lé Vivan, é i kontinyé évolué é ke Marmay dann lékol i port Ali kom in Fanal, in Flanbo !

Ekri an kréol lé pa fasil, lé pa « anodin » non plu.

Sé prann in langajman, osi bien Emosionel, ke Spirituel, mèm’ politik !
Zot la anserv’ zot kër, zot talan, zot kréativité.

Shak mo, shak fraz ke zot la poz desu in fëy, sé in réusit’ In témoignaj, in Résistans’ kont loubli, kont le mépri !

Nou lé fièr de Zot.
Fiér de voir azot dékouv la puisans’ bann mo, la rishès nout lang ek la liberté de dir le fonn’ zot pansé, ék zot kër san la ont’ desi zot.

Kontinyé ékri,
kontinyé gard la lang dan zot kozman,
kontinyé port Ali anlèr kom in zarlor ki fo pa largé, kontinyé fé réyon’ nout péi !!!
In gran IPIPIP pou ZOT TOUT’
Zot tout nana la Fors’ !!! »