Lorans, èsplik a nou la filozofi Kabar ?

— An dé mo, lasosyasyon Kabar lé la pou fé viv lidantité nout péi La Rényon. Èk osi lo Lang Rényoné, Listwar nout Péi, nout Maloya… Nou lé la pou rasanm Rényoné pou konèt myé nout gadyanm kiltir. Nou la fé konèt osi nout Péi an Frans.

Kan sa, zot la komansé ?

— Nou la komansé koté Drancy, pa loin Pari an mars 2009. Nou la fé inta “Zourné Maloya” pou fé konèt nout mizik rasine, pou nou minm aprési ankor plis nout zarlor. Nou la prézant inta liv an Lang Rényoné pou “Journée de l’Île de La Réunion à Drancy”. Nou la organiz osi in komémorasyon “Pou tout nout Zansèt èsklavisé !” koté Ministèr Loutre-mèr an avril 2012. Navé la projèksyon in film-dokumantèr “Élie ou les Forges de la Liberté”. William Cally lo réalizatèr ansanb Ivrin Rosalie, prézidan Komité Éli — dan’d tan la —, lété invité.

« Moin la artourn viv si la Tèr bann Zansèt »

Moin la antandu dir, ke na poin lontan d’sa, zot la organiz in manifèstasyon pou lo 350ème anivèrsèr la nésans nout pèple. Di a nou in pé plis ?

— Lané la, lasosyasyon Kabar i fé sort dan’d fénwar lo doulèr 1665 marmay nout péi. Lo 13 sèptanm, nou la fé in “Zourné souvnans pou 50 lané déportasyon marmay La Rényon an Frans”, “Marmay lwin zot Péi !” ou “Une enfance en exil !”. La s’pasé koté Ministèr Loutre-mèr avèk la projèksyon in nouvo film-dokumantèr William Cally avèk lo dir Sudel Fuma, istoryin chèrcheur. Nout vis-prézidant lété la osi, Mari-Térèz Gaps. Èl osi sé in zanfan la ariv an Frans laj 3 zan, in lèkzil forsé !

Kisa i done a zot la min pou mèt an plass tou sa ?

— Nou fé tou sa èk in ti pé lèd Konsey jénéral La Rényon. Nou ansort anou è knout kouraz. Sak lé inportan sé fé manifèstasyon pou mèt dan lo féklèrsité nout Lidantité.

Ou la viv pandan in tan an Frans. Ou la artourn dan out péi, pou kosa ?

— Astèr, moin la artourn viv si la Tèr bann Zansèt dépi zanvyé. Lasosyasyon Kabar i kontinyé sobat pou lidantité Rényoné koté Drancy. Nou sa mèt an plass osi dé traw projé pou lo Pèp Rényoné i métriz son kiltir, èk lo konésans son lang kozé èk son lang ékri, lo kronoloji nout Listwar Péi, in méyèr konésans listwar Maloya èk Séga, èksétéra. 350 lané aprè la nésans lo Pèp Rényoné, nou pé war ké nout kiltir lé an souffrans zordi, nou dwa aprann viv an Rényoné pou avansé, pou afirmé nout lidantité. In Pèp lé an lèr, kan li pran la fors dan son lidantité.

Nou va konitnyé di a zot kansa Kabar i done a zot randé-vou. Lorans i fé part ban’d nouvo zarlor nout Rényon. Nou pé di a èl kontinu sobat pou son péi.

Reportaj Jan-Fabris Nativèl

Kontakt

• Nout sit : www.noutkabar.fr

• 0692 94 14 59