Natacha Tortillard èk Françoise Guimbert.

Nout lang kréol lé gayar ! Lé an nou, nou lèv, nou dor é nou va alé ansanb. Zordi, nou pé koz kréol dan’d post radio, post télé… mariyaj lé sélébré an kréol, lakeuil zadministré lé an kréol, nana non d’vil an kréol, la pib, fèstival an kréol… É sak lé gadyanb, sé ke nout lang lé anségné. Kit ta bouèt ! In takon zartist i kré an kréol : chantèr, ékrivin, fondkézèr, grafèr, konpozitèr, kontèr, pint, poèt, skiltèr… Dan’d “Rogar” zordi, nou félisit a zot pou tou lo travay ke zot i fé pou mèt la lang kréol an lèr. Nou koné lé pa fasil, na ankor préjujé, na ankor in pé la ont… Na mèm dé sèrtin i batay pou in K, mé moin lé pa la èk sa é èk zot !

 Reportaj Jan-Fabris Nativèl