Mé zamis, le mond astèr y part en désorde !
Néna saroyèr bann zarmes, bizness la mort
Mé dann zot bousse, na rienk la pé y sorte
A ou, ou kompran un zafèr enkor ?

La pé dessu zot toute, as salam, shanti, shalom
Arriv’a zot ! Vyen komprann zot prop doulèr
La pé avec ou meme dabor, épi ek dot zom
Ton lâme en sakouyaz, arriv ek ton fonnkèr.

Oté ! Sa lé vré ! Y di ke pou fé la pé
Y fo tèt dé moun, pou sa meme
Pou montré ke lé byen malizé
Mi fé dabor la pé ek mwen meme.

La pé, lé pas un zafèr ent bann complis
Zamé li doit ète koté lo pli for
O contrèr, li doit amont la zistice
Et zamé li doit faire plis lo tord.

Li doit casse nout mauvé conscience
Kom un gadiamb fanal dann’l tan cyclone
Not conscience y éklaire noute parèy intelizence
Li éklaire toute koulèr et la limière li donne.

Pranl’temps réfléshi su la guèr
Calkile byen son vilin ravazes
Pran le tan rogarde en face la mizèr
Et dia mwen kosa un lamayaze sovaz.

Assé ! Arête tire dosi zenfan ek bann fanm
Assé ! Arête tire su la vie, su lamour
Assé ! Arête fanne la boue su la flamm
Laisse la vie la éclate en bard’zour.

La pé y fé sorte a nou dann fénwar
Ici la Rényon, nou koné kosa y lé
Nou porte a li dann nout doulèr listoir
In passé colonial lontan sabouké.

Bon Diè, nou domann a ou misérikord
Nou suppli a ou pou lamour é le respet
Fé ke bann zom y arèt mete la korde
Dann’l cou zot bann frères en limanité.

Nout conscience sé not lintimité
Avek li personne y gainye pa sapé
Sa même y doi éclair not lidentité
Nout gayar liberté pou artrouve la pé.

Koméla, kan mi vwa bann zenfan réyoné
Mi di a mwen ke banna y vé vive en pé
Kom un gadiamb pou limanité
Alé di partou, la Rényon péi la pé !

Omar Issop-Banian
Sin’ni avril 2024