(page 4)

o Éloi Dosite : "Lé pi lèr di oui patron !"
"Moin la travay tout mon vi. Zamé moin la antan dir la droite la fé in bon zafèr pou lo pèp La Rénion. Se konstitision sé in zafèr la droite ke la touzour soutien bann gro zozo. Zordi, moin lé à la rotrète, moin lé pi sou la koup personn. Lé pi lèr pou moin di "mersi patron". Sé konm in onm lib ké lo 29 ma lévé e ma lé di “non” avèk mon biltin. Mi pans tout do moun lé trakasé par lavnir bann zèn i doi mèt in kou daré la politik bann gro ké nana dann se Konstitision".

o Adrien Tian-Van-Kai : "Dir “non” bann abizèr" !
"Astèr i fo bann travayèr i travay la Pentecôte, lo gouvernman i arèt pa abiz sur lo pli fèb é kan li fé in konstitision là, lé touzour pa pou lo pèp li travay. Li pans kass a nou ankor plis. Leurope ke li propoz lé pa pou nous sa é konm i vien do li, là i kou pa : mi sa va vot non, na poin rien d’bon la d’dan pou nou" !

o Joseph Grimois : "Lo 29, nou va dir lo gouvèrnman arèt fé pass a nou la mizèr" !
"I fé lontan mi lé o somaz, é lé pa lo Konstitision lo gouvèrnman i propoz va sanz in zafèr. O kontrèr. Va agrav ankor plis. Fodra batay dé foi plis ankor pou bann zèn gagn in travay. Poukoué ? Parské zamé moin la vi gouvèrnman Raffarin fé in bon zafèr pou lo pli défavorisé. É lo 29 nout tout i doi di a li : arèt in pé fé pass a nou la mizèr.
Minmsi li la soizi exprè la fèt dé mèr pou anpès anou alé voté tandik son bann partizan va mobiliz azot, nou va alé voté".

o Jean-Guy Candama : "Voté "non" pou sov lèspoir"
"La Konstitision lé propozé i aportra rien de bon pou nou, pou bann pli pov. O lié vot in zafèr konmsa, gouvèrnman i devré mié fé dot loi i èd bann pli p’ti. A koz li fé pa ? An France, li fé pa rien pou nou, la pa dann l’Europe, li va sanzé. Si nou vote “oui”, nou sora totoché ankor plis, aprè i poura pi rokilé parské la di i fodra tout péi lé dakor pou sanz in zafèr. Dann sé kondision, nou pé pa fé otreman ké vote "non" pou sov lèspoir".

o Émile Saman : "Gouvèrnman la fé tout pou ké lo 29 nou di a li "non""
"Nou va dir "non" pou un paké rézon. Nout rotrète lé pa sifizan, i tir ankor é touzour si sak i trime, si sak na poin. Déza, pou bann vié, o lié èd a zot, lo gouvèrnman i di bann travayèr a zot donn larzan pou banna. É lé pa èk se Konstitision li va défann bann pli fèb. Zamé. Li la fé tout pou ké lo 29 nou vote "non", alor, nou doi pa désoi li".

o Philippe Agen : "Normal réponn “non” o “oui” du gouvèrnman"
"A moin, mi sa vote "non" par rapor la politique Raffarin. Sé in politik démolision sosial, kan mi voi koman li trèt bann vié èk la CMU, la Mutuelle, zot rotrèt ké i diminu, aprè li fé touzour pa in zèst pou banna, li di i fo travayèr i mèt la min a la pos pou banna, la tro sé tro. Le bann zartik nana dann lo Konstitision lé parèy son politik, lé normal li lé pour. Normal osi, nou va réponn "non"".

o Christophe :
"Lo “oui” va rien aporte anou de bien. Par kontr, lo “non” va rouv dé pèrspèktiv pou ki rèspèk la dignité do moun la baz. Banna i arèt pa matraké pou le "oui", i rod fé pèr, i di ninporte koué. Par kont i di pa ke si lo "oui" i pass, i poura pi rien sanzé, tout sora vérouyé. Kisa lé asé fou pour vérouy son lavnir èk sak son bann zanfan ? Lo bann zot péi i atann èk inpasians lo vote la Frans. Alor, pou rodonn lèspoir bann i lite, ni doi prann lo dovan é voté “non”. Sora in désavé pou Raffarin é va rouv in gran brès pou bann partizan lo "non" an Europe".