Médam zé Méssyé, la sossyété koz èk mwin sé koz èk in kouyon, mé sé o pyé d’lo mir k’i wa lo masson.

Mézami,nout toute i koné guèp.Nout toute i koné i fo pa arvaz ali pars si wi arvaz ali , li défande ali, é li atak . Bande gramoune lontan i di guèp i fé pa ou arien si li l’apré rode son paye, sansa sak i fo pou li songn bann-ti sansa la réne. Mé toush pa li pars si ou la tosh ali, li astik aou. An gro li done aou gro-tète.

Konm nou l’apré anparl in provèrb i fo ni sèye konprann si kozman-la i aplik dann in sossyété d’moune par ébzanp. Mi panss ké oui ! Si wi koné néna danzé kékpar, wi sava par rante ladan pars malèr pou ariv aou.

Alé ! mi kite azot rofléshi la dsu, é ni rotrouv pli d’van.
Sipétadyé.