Oté

Boudikonte nou sar pa zote, mé sé zote sar nou

Témoignages.re / 18 zwin 2021

JPEG - 43.6 ko

Mézami m’a dir azot in n’afèr : i fo pa tyé kouyon pou pran son plass. Mi di sa pars so matin mwin la tonb dsi in radio in moune té apré fé in diskour. Mwin la ékoute in pé a la vol épi avèk in pé pliss atansyon kan mwin la konpri lo boug té apré dévlope in tèz pou ronyé toute sak mwin pèrsonèl mi kroi, toute sak lé dann mon panssé.

Momandoné li la di : kissa i pé dire li lé d’issi é pa l’ote. kissa i pé di : déssèrtin i vien issi pou pran travaye rényoné. Pars sanm pou li travaye pou rényoné sa i égziss pa. Aprésa li kontinyé dsi son lanssé épi li di : na poin rényoné, pars toulmoun lé rényoné. Mi koné pa si zot i suiv amwin bien pars si i di toulmoune lé rényoné é pèrsone lé pa rényoné sa i vé dir lo pèp rényoné sansa lo non-pèp rényoné sa lé san porte é san fénète donk li égziss pa. Nou sré in ta d’moune déstriktiré, fane-fané.

Souvan dé foi néna in pé i di kissa lé rényoné, é kissa lé pa rényoné issi La Rényon é sa i agass amwin in pé plisk’i fo. Mé li lo boug dann radio li sava ankor pli loin, li dévlope in panssé négasyonist vi ké li ronyé nout droi fé parti d’in pèp rényoné… Si i kroi ali nous sré in popilasyon san arien pou inifyé anou, san arien pou disting anou par rapor lé zot.

Alon arèt in pé avèk bononm-la mé si la bézoin i fo pa ézite morde ali, mé alon sinploman rapèl sak ni pé di noute fondamanto :

Nou lé issi La Rényon dann in péi limité dsi lo plan zéografik, nou lé ansanb pa arienk dopi dë zour mé dopi troi-san sin kantan. Nou la gingn lo tan fé noute lang, dévlope nout kiltir é ni pass sa konm i pass rolé zénérassion an zénérassion.. Si ni vé ni pé ékri noute listoir, in listoir souvan san zimanité é néna bande gran zistorien la ékri. Si ni vé ni pé ékri in gro liv dsi noute kiltir. Si ni vé ni pé ékri toussala dann noute lang kréol rényoné..

An pliské sa, nou néna in santiman i amar anou lé z’inn avèk lé zote é noute gatire-la, ni pé apèl sa nout konsyanss rényonèze. Alor ni doi défann sa konm in fo défande in trézor-in jarlor – pars sé sa k’i fé noute lidantité… sé sa k’i fé ké ni atir, ké ni assimil dopi dé zénérassion é toute sak va vni shé nou, nou sar pa zot, mé boudikonte sé zot sar nou.

Boudikonte la bataye kiltirèl sé tou l’tan k’i fo amenn ali.