Mon zournal “Témoignages” i doi kontinué.
Zordi mi témoigne :
Kan moin lété pti
Mi rapèl ankor
Mon papa lété dokèr
Dan so tan la
La vi lété dir
Li té i fé son zourné
Lo swar kan li rant
Kosa lavé dan son tant ?
Son zournal èk do pin

Li té pran son ti ban
Li té asiz
Li té apèl amoin :
« Lir zournal la pou moin »
Moin lavé tou zist 10 zan.
Moin lé sir tout dokèr
Té i fé sa èk zot zanfan
Parske zot té i koné pa lir.
Mi rapèl ankor
Zournal lavé dé paz
I falé lir tout.

Donc bann dokèr
Té i soutyin byin nout “Témoignages”
Bann chemino osi
Sa lété inportan pou zot
Kar sa mèm té i défann a zot.
Kan zournal la té ataké
Bann dokèr é bann chemino
Lété solidèr de zot zournal.
Zordi nana i vé kas ali
Kamarad lès pa nout zournal tonbé
Kamarad anon mèt la min ansanm
Pou ke nout zournal
I rèst la mèm,
I viv ankor lontan
Pou nout péi
Pou nout zanfan
Sinon la poin dot pou défann anou
Ke “Témoignages”.

Ninine