Ma rakont azot in zistoir.
Lavé in foi dann Saint-Paul...
Lavé in ta d pié de boi
Ki soi dan lé o ki soi dan lé ba
Si litoral li, dann fon la vil li,
Dann fon létan, dann fon la grote.
Parmi tousala lavé zoizo,
Zoizo bélié, kardinal, zoizo bèk roz,
Mé lavé osi in ot èspès,
In èspès ki ranp an sourdine,
I apèl ali landormi.
Si son do nana zékay,
Li résanm in pé lo gro margoz
Li lé vèr, li lé zonn,
Kan li lans son dar pou gob son proi,
Tansion dovan !
Kan li pass si pié d boi nana flèr rouz
Li ri, li lé kontan, li sot,
Li voyaz, li sa partou.
Mé kan pié de boi flèr rouz
I dovyin pou li tro rouz,
Alor li voi bleu.
Alala landormi i sort si lo pié d boi
É hop ! Li sot si in ot pié.
So pié d boi la, lo flèr lé byin bleu.
Tout son kor in dovyin bleu !
La fransh vérité sé ke
Shak foi landormi lé pi mi an valèr,
Lé pi si lestrad,
Li rod in manièr pou rèst touzour an lèr...
Si ninporte kèl pié d boi !!
...
Dé troi zané pli tar
Li sra petèt jeté
Li sra tou sèl
Li nora pi kamarad
Ni si lo pié d boi rouz
Ni si lo pié d boi bleu...
Mèm vacoa i voudra pi d li !!

Kamarad, lo konba kontinu.

Ninine, Le Port