Mon bann zamiz, mon bann zami, an dalonaz avèk la koz Chagos

In l’ané i sort fini. In l’ané nou la mète ansanm pou ède nout bann sèr é frèr chagosien pou lité pou z’ot rotour shé zot, dann z’ot péi dann milyé l’oséan indien. Zot i koné dann sète ané la, néna dé shoz inportan la spassé é shak foi nou la tash moiyin donn nout bann z’ami rényoné épi l’opinyon an zénéral l’informasyon pou suiv la lite nout bann sèr épi nout bann frèr.

Nou, comité solidarité Chagos La Rényon nou la kontinyé lo dé misyon nou la donn anou kan nou la fé nout l’asosyasion dopi talèr sète z’ané. Inn nou la donn nout bann konpatriyot rényoné tout z’informasyon pou suiv la lite nout bann sèr é frèr ; dé nou la asosyé pou anvoye l’arzan pou bann chagosien pou pèrmète azot avèk lo pti moiyin nou néna kontinyé z’ot lite.

Ni pans dann lo dé bi, nout komité la avansé avèk son bann z’ami dévoué pou la koz ni défann. Ni èmré fèr plis ankor si nou l’avé lo moiyin mé sak nou la fé lé déza byin, é bann z’ami Olivier Bancoult i di anou i amontr pou nou rényoné la solidarité la pa in parol anlèr.

Nout bann z’ami, an dalonaz avèk bann chagosien, ni souète azot in bone ané 2018, ni romèrsyé azot dann fon nout kèr pou z’ot solidarité par rapor bann chagosien. Kréol i di : « in min i lav l’ot ! » é sa sé lo prinsip mèm la solidarité. An atakan l’ané 2018, ni souète ni kontinyé mète la min ansanm pou ède nout bann sèr é nout bann frèr.

Bone ané zot tout ! Bon soutien nout bann z’ami chagosien ! Progré dann z’ot lite é ziska z’ot viktoir pou touzour.

Prézidan : Georges Gauvin
Sogrétèr : Alain Dreneau