Luttes sociales

CGTR SPEKTAK : « Apel po tout bann Zartizan La Kiltir la Rénion »

Témoignages.re / 10 séptanm 2020

JPEG - 90.6 ko

« Dalon zartizan nout kiltir,
La kréasion seksion sindikal CGTR Spektak i ariv dann in tan oussa bann zinstitusion, bann profesionel nout filièr kiltirel la di komsa “le bann zartis lé pa roprézanté, lé pa uni”. Parlfèt, i donn pa nou la parol dann bann désizion i konsern a nou an promié lié.

I fo pa nou oubli ke san bann zartis ek teknisyin (bann zartizan la kiltir), san bann kréatèr, na pwin festival, na pwin téat, na pwin sinéma, na pwin divertisman, na pwin la radio, na pwin la dans.

In sindika li lé la po défann bann travayèr é port zot vwa pli lwin, pli for. Li inform a ou osi su lo bann drwa kolektif é individuel dann out dominn. Kan ou adèr ladan, ou retrouv dot moun dann minm situasion, i batay po le minm valèr : respé dann travay, respé domoun, respé nout kiltir. Ansanm i giny port in minm mesaz in pé pli lwin, po rann méyèr nout kondision travay, donk nout kondision dann la vi.

Zordi nout tout la Réunion lé dann kovid, domin nou koné pa kosa va rivé. Mé avan se maladi, navé deza bonpé domoun dann malizé, bonpé domoun i oz pa kozé, bonpé zartizan ke la pa santi azot konsidéré, ni konsulté. La finn ariv lèr po nou défann nout métié. Sa in pilié po nout sosiété, nout patrimoine, nout péi.

Set nou la fini fé :

• Nou la fini rankont le direktèr Rézional Pôle Emploi po demann la réouvertur din lantinn Spektak isi la Réunion, ek domoun formé po giny swiv le bann dossié bann zartizan. Nou la pu war ke laxé dann lintermitans té konpliké po désertin, po défann zot dossié par examp kan in moun devan ou i koz pa le minm langaz.

• Nou la pran kontak ek la Fédérasion Spektak de la CGT o nivo nasional. Nou avans ek banna depi se tan la, po ke zot i port nout spésifisité la ba dann Ministèr.

• Nou la interpel Mr Le Ministre des Outre Mer su le mank vizibilité kiltirel dé Outre Mer, dessu la disparision France Ô é dot dispozitif ek téat po bann kréasion Outre mer an Frans. Li la pa réponn a nou. Mé nou va relans a li.

• Nou lé intervenu dann télé, dann radio po koz dé difikulté ke bann zartizan i rankont dann, é an déor Covid.

Revandikasion :

• Oktob 2020 : La CGT Spectacle nasional va rankont Pôle Emploi Spectacle po défann labésman du nomb dèr po rant intermitan + défann la réouvertur lantinn Pole Emploi Spectacle la Réunion.

• Nou batay po lékité teritorial, la vizibilité ek la mobilité bann zartizan la kiltir. Isi la Réunion nou lé pa égal ek la Frans : nou na pwin asé lé moyen po nou èt vizib. Po fé le bann kashé lé plu difisil isi ke lé zot départeman an Frans, pars nout teritwar lé plu ti an surfas, nou na pwin otan de sal spektak oussa nou pé travay é nou giny pa le minm posibilité de difuzion é déshanz.

• Nou batay ossi po et konsidéré dann nout péi, o nivo lokal. Po koz la difuzion, lakonpannman, le swivi ek la rekonésans la kalité nout bann prozé.

Bann zartizan la kiltir la bezwin zordi kom touzour rankont zot publik é devlop a li.

Nou lé pa plis, nou lé pa mwin ! apel anou ékri anou pou mèt ansanm ! »