Mézami, m’a dir azot franshman, kozman-la mi yème pa li pars mwin la konète bonpé d’moune téi pran sa promyé dogré… Mi koné in séga i di konmsa : « Zanfan la pa mwin, mi done pa manzé, mi nouri pal o vèr pou pike mon kèr ». Mézami dann mon vi mwin la vi toute sorte shoz : in zour mwin la konète in méssyé téi done manzé son prop zanfan é pa lo zanfan lo fam l’avé avan konète ali. Si zot i koné zistoir zot i koné sirman dé ka la famiye té inzist avèk in zanfan é téi fé proféranss pou lé zot (…)