Médam zé méssyé kozman-la mi rapèl mwin la antann sa, dann tan, dovan la boutik kan momon téi anvoye anou, son bann garsson, pou ashté in komission rant-rant. Lalkol téi monte a la tète in pé, é bataye téi pète-pli for, pli fèb, inn i done lo grin, l’ot i pran lo shok. Pli fèb i pran bouton é i ménass ali pran lo flèr la proshène foi. Koméla la pi konmsa, mé i vé pa dir kan néna in rogroupman d’moune sa i éspass otroman ké lontan. Néna touzour pou gingn bouton épi pou gingn flèr. Alé ! (…)