Tikok i vien n’ gingn katorz an, é li komans avaz ti fi, alé bal… tousa-la. Soman, promié kou li la parti bal, li té pa loin gingn in zo ! Oila koué la fé : Tikarl i ariv, i di Tikok : « Anon bal ! – Moin na poin linz, Koulou ! – I fé arien, vien aou, m’a prèt aou in kilot sanm in somiz ! » Tikok i sava la kaz Tikarl, i désanz, i mèt lo kilot-grann-mans son kamarad, sanm in somiz blan. In gayar kilot gabardine blé, i moul bien Tikok : li lé fringan an-ndan-la, foutor, i fo oir !… (…)