Lontan, débi lané, tout la fami téi retrouv azot otour in bon ti kari, téi rakont lané pasé, èk sat téi ariv. Zordi, tilanp tilanp gran bobès, la fami i sépar, i margony, ziska po batay. Rod apré pokosa nana marmay nana pi valèr po baz dési ; rod apré pokosa détrwa i may la bétiz, po dor rant kat mir. Konm di mon granmèr, "marmay na pwin lantouraz fami, forsé li tonm pli ba k’atèr". O ! i pèrs la mok, v’a di Kalo. Justin