Ala in kozman mi konpran pa bien lo sakivédir. Fransh vérité lé dé i marsh pa ansanm : zaran lé salé vèy pa koman, dé foi mèm li lé in pé amèr. Bonbon koko, sa lé bien dou ! I di pa pou fé bobon koko i mète mèm kantité koko rapé ké dosik ?… Mé moin néna in souvnir dann tan moin té i pass vakans Sin-Lé. Dann tan-la l’avé in madam, i di, té i sava rod in sipléman avèk bann mari la pa li. Donk in vyé péshèr tramaye demoun té i kriy ali Léon Boudiny Ernest téi oi souvan lo tourné-viré lo madam (…)