Mésyé, médam, la sosyété, dann tan lontan l’avé poin tro shomin blaké : shomin té an tèr la plipar d’tan. An tèr kan la plui i tonm pa, mé an bou kan k’i tonm. An pliské sa, avèk bann sharète a band, shomin té fouyé é arfouyé. Kan sharète té anbourbé demoun téi dmann sokour pou tir azot dann l’anbara. I fo dir demoun téi èd in pé lo bèf tir son sharète dann in movèz pass. Mé kozman-la néna in n’ot sans : lo sans demoun téi ankouraz kélk’in pou fé kansréti bon zaksyon sansa mové zaksyon riské (…)