Mésyé, Médam, La Sosyété, koz èk moin sé koz èk in kouyon-sé o pyé d’lo mir k’i oi lo mason. Bouftang ? Mi pans zot i koné kosa k’i lé ? Pou sak néna in trou d’mémoir, mi rapèl azot sa sé t’in poisson sa. I pé apèl ali ankor gouf, sansa diodon, sansa ankor poisson-glob : néna dann résif épi néna galman dann kré, déyèr brizan. Si ou i pik ali avèk in fouine sansa in fizy soumarine li gonf d’in kou, son bann zépine i drèss. Astèr si in moun i mète a gonflé par la raz sansa par la kolèr i di li (…)