Mi vé anparl lo roman dann la lang kréol, mé pou sak néna dë grin la mémoir sa la sorte galman dann la lang franssé avèk konm titr : « Faims d’enfance » dann bann zédission Le Seuil, in lévènman pou la Rényon si mi rapèl bien dann tan-la, in lévènman pou toute sak la lir zistoir-la épi sak la grav sa dsi dik-dir zot mémoir.

La faim i fo prann sa dann son sanss promyé pars bann marmaye fransh vérité téi soufèr la faim é lo sèl vré ropa in bonpé téi gingn pran lété lo ropa la kantine avèk dori, lo grin,kari é sa téi pran kan onzèr téi sone lo zour néna lékol pars biensir téi manj pa la kan tine dann vakanss, bann gran sansa bann pti vakanss, épi lo bann zour na poin lékol dann lané éskolèr.

I fo mi di azot sa téi éspass pa tro lontan d’tan apré kan la guèr mondyal lété fini é kan La Rényon départman la franss lété pankor bien rante dann l’aplikassion. Lé vré nou lé départman franssé dopi la loi 1946 mé la mète lo tan pou aplike sa é bann famiye la pa bénéfissyé toutsuite bann zavantaz sossyo.

Axel i rakonte bann marmaye té mèg, mèg, mèg mèm épi an movèz santé é in pé téi fé ziska konkour pou manj in bonpé assiré ké lo soir mèm lo matin l’avé arienk bann frui sovaz épi kann pou sov azot in pé… Bann métrèss lékol, déssèrtène lété dévoué, apré sèye fé pass inn-dé marmaye lo gran sansa lo pti sèrtifika é sa té pa fassil dann in vilaz déshiré par la politik épi par bann fashri dann famiye, avèk bann konplotist toute akabi.

Légliz té in pti légliz avèk in vyèrz l’avé kapote dopi lo pointi légliz ziska in pti léspass par dovan.La klosh té akroshé avèk in pyé filao é sé in kominist l’avé fé mète sa épi tazantan avèk son voi in pé érayé li téi kriye « mète mon pti klosh atèr » mé la klosh téi rèss la mèm avèk son kadandang pou anonss la mèss.

L’avé ossi bann z’amour d’adoléssanss : Soubaya in gran malbar téi flash pou Lina é Lina in yabèss téi flash pou Soubaya. L’avé la ropréssion, la ménass, la rézistanss bann marmaye épi bann grann pèrsone épi lo tan téi suiv son kor konm li té i pé é sak la lir lo liv i koné lo bann konfli é sak la pankor lir li pé rogarde sa dsi son téléfone osinonsa dsi son lordinatèr.

Alé, mi kite azot pou zordi é ni rotrouv pli d’van.

A bon antandèr salu !

Série Bayalina