Dann Témoignaz yèr moin la komans anparl dsi Guanomad, in l’antropriz pou transform kaka shov souri an l’angré biolozik donk dan in l’angré natirèl. Dabor kisa la mète sa anlèr ? In moun i apèl Erick Rajaonary. Kèl sé son l’anbisyon ? Dévlop lo bio dann Madégaskar épi dann lo mond antyé.

Bann produi Guanomad lé déza ésporté dann L’Afrik , dann Kanada, dann l’Erop é a l’èr ki lé li la mète son pyé dann Zétazini L’amérik avèk konm l’intansyon pa sèlman fé larzan-lo profitaz-mé mète galman anlèr in dévlopman sosyal pou in méyèr partaz bann rishèss.

Zot va di amoin é zot néna rézon, pou an avoir in l’anbisyon konmsa i fo larzan-lo nèrf la guèr- é pou gingn larzan Guanomad la asosyé avèkin fon l’invèstisman l’afrik di sid ziska karant pour san son kapital.Sa i pèrmète lo group pou vni in group koni dsi lo plan internasyonal. Fon-la i amenn larzan ziska 3 milyonn dolar amérikin mé galman in kopérasyon téknik ziska sink san mil dolar pou divèrsifyé bann produi épi amélyor zot kalité par la roshèrch.

Ni pé di ankor lantropriz i donn kou d’min bann kantine éskolèr, i distrivbyé plizyèr milyé gouté pou marmaye, é si la bézoin i fé ziska la rout pou dézanklav bann vilaz néna bann grote pou tir lo Guano shov souri. Arzout ankor lo group i kolabor avèk bann zotorité vilazoit épi i dévlop la min d’èv sézonyèr, ziska sisan travayèr shak l’ané.

Lo group i anons plizyèr prinsip :inn sé la lite kont l’insékirité alimantèr*, dë lo dévlopman lo bio,troi dévlop la kanpagn épi protèz l’anvironeman avèk final de kont in bi sé d’ansèrv l’agrikiltir pou fé rokil la mizèr dann Madégaskar éi dann bann péi an rotar dsi la késtyonn lo dévlopman.

Mi tienbo la pou zordi mé obli pa zot i pé alé dsi l’internet pou trouv i paké l’informasyon dsi bann l’antrpriz konm guanomad épi in paké prozé demoun i dévlop dann bann péi l’afrik. Moin lé sir si zot i fé so bann pti roshèrch-la zot va gingn zidé pou in méyèr dévlopman nout péi La Rényon.

*Si lé nésésèr ni pé ardi ankor in kou dann lo plan 25 poin program PCR néna la sékirité alimantèr plizanplis a l’ord di zour dann bann péi i vé trap zot dévlopman pou vréman.

Justin