É, zot ! Bann moun i koné tout z’afèr ! Di amoin pou kosa la fé in moniman pou Edmond Albius, la-ba dann la komine Sint-Sizane ! Di amoin ankor pou kosa la dépans larzan pou amèn la dépouy Leconte de Lisle dann simetyèr Sin-Pol, épi sète Lacaussade dann simetyèr Salazie ! Ésplik amoin in pé pou kosa la fé mizé Léon Dierx ! Mizé dosik dann lizine Stella ! Épi ma mézon volkan !
Di amoin si sa i ansèrv kékshoz sinonsa si i ansèrv pa aryin !

Pétèt zot va di : sa in bon z’afèr pars i fo bann Rényoné i koné in pé byin z’ot péi, lo bann moun sélèb, kosa té i fé dann tan lontan konm prodiksyon !
Pétèt zot va di : lé pa si tèlman itil ! Mé si zot i fé travay zot tèt, zot va konprann koman bann z’afèr konmsa lé itil, lé mèm nésésèr !

Alor pou kosa so wati-watia pou la mézon dé sivilizasyon, dé linité é dé la kiltir rényonèz ? Pou lo pri ksa i kout ? Mé sé près pa nou k’i pèy sa ! Pars nou lé pti é ni mérite pa ? Pars, solon monségnèr lévèk, si nana in mirak isi, sé lo pèp rényoné : donkalor, ni mérit byin sa ; ni mérit byin in n’afèr konmsa !

Justin