Moin lé né dann in famy oussa la di amoin larjan, sa lé sal. Pa si tèlman pou la salté nana dëssï kan i pass min-an-min. I prétan dir nana tout sort shoz, nana mem bann myèt zéskréman dsï. Mé lï lé sal pou d’ot rézon : manièr in pë gro vaza i guingn alï, manyèr bann gangstèr i guingn alï, batay lï déklansh dann bann famy. Sirtou la poin l’égalité dann larjan.

Moin nana in kamarad, son patron la bat alï déor akoz li la guingn in prosé- vèrbal sï la rout : la pa donn alï in grin larjan. Jordï, lï lé dëvan prïdome. Nana in gro patron lantrepriz lavion, EADS, li la fé pèrd miliar son lantrëpriz, la bat alï déor solman sa la raport alï pliss uit milion lëro. Apré lï la di :"Vï mon valèr, sa la pa égjajéré !". Uit milion, sa i fé sak ui mil travayèr i gingn o moi. Kan mi di azot larjan la pa jïst !

Nana in lanpérèr romin, té i apèl Vespasien la fé mèt bann ti-kabiné dann Rome, kapital son lanpir. Pou fé in bézoin té i falé donn in moné. Donkalor sa téi raport larjan. Inn dann son konséyé la di alï, la pa bon fé sa pou in lanpérèr. Li la réponn : "Larjan la poin lodèr !".
Sa moin la pa sïr !

Justin