L’inpéryalism l’informasyon, t’in tig an papyé !

Mao Zédong té i di : « l’inpéryalism sé in tig an papyé ». Li té vé dir konmsa, la pa akoz l’amérik sé in gran-gran péï pou l’ékonomi, la sians, lékipman son bann solda, él i gingn mèt aznou tout pèp. La prèv : la-ba dann Viétnam, èl la gouté. I tard pa èl i gingn ankor inn-dé galo par-si, par-la.

Lé drol, sa i amèn amoin parl sï l’informasion. Sa sé in gran késtion, sa, akoz ou pé an aoir tout méyèr z’idé, si sa i ariv pa dann zorèy demoun, ou lé batï. Ni koné bann télé, bann gran radio, bann gran zournal, lé kont nou. Lé konm in guèr, zot lé apré fé a nou : kritik in moun, fé ali tout kalité kanikrosh, la pa bien ; fé la mèm shoz tout in parti, la pa bien, la pa sa la démokrasi !
Pli grav , kank lé riskab anklav lavnir in pèp : dévlopman dirab son lékonomi, son kiltir, lantant rant bann moun, son libèrté. Séryé, in ! Zot i kroi pa La Rénion l’apré soubat pou son lavnir ?...

Donkalor, lé ga ! Si nou na poin gro moiyin pou gingn so guèr la, ni pé pran in bann ti moiyin ! I di pa David la kine Goliat avèk in flesh épi in pti galé ? Si l’inpéryalism linformasyon sé in tig an papyé, pou vréman, nou lé pa batï d’avans. Fransh vérité !

Justin