Kossa la spas la-ba dann bannzil komor ? Kissa i lé so kolonèl Bacar ? Pou kossa, zordi, in pé lé pri dann inn pomp ? Zot lé konm moin, mi sipoz, pars moin, zordi ankor, moin lé a d’mandé kossa la spassé.

Kan moin la antann la télé té ki sar di anou, dimansh o soir, tout sak l’arivé la-ba, moin la di dann mon kèr : gran matin moin la lèv inbésil, si mi mor dan la nuite, mi krèv ar pa kouyon. Mèrsi RFO, mèrsi bien la télé. Rozman, zot la trouv in fime la dsi, rozman zot la trouv in sèrtin méssié “mi koné”.

Asiz déssi mon boi d’zo, mi aspèr. La i sava di la vérité ! Si i koné pa, i konète ar pi : in pti fime va sort a nou dann la fénoirsité pou mète a nou dann la féklèrsité.

Ala, lo fime la fini ! Ala, moin lé touzour asiz déssi mon boi d’zo ! Moin lé touzour a d’mandé kossa la spassé ; Zis in n’afèr mi konpran mié : sé lo pti provèrb kréol k’i di konmsa : « Mi koné la pa bézoin alé linivèrsité ». Sa lé bien vré !

Justin