Olivier Bancoult, lo kèr i singn pou son péi, bannzil Chagos : péi li la pèrd, péi bann kolonialis la volé pou donn a loué bann Boushé, pou alé lèv la guèr partou.

Mi souvien in zistoir nout dalon la rakonté kan nou la vi ali dann Por : in zistoir lo shien. Li té pti, épi li té malad, prè pou mor. Kan bato la trap ali pou amènn ali lopital Sésèl, li la di èk son gromèr okip bien son ti shien... Déyèr son do, bann kolonialis la tié, la brilé, la ranvèrs ki si tète lo péi épi la déport toulmoun.

Dé foi, dan la vi, nana mirak : nout dalon la guéri. Bato l’armène ali in péi li koné mèm pa, la-ba dann Moris. Son gromèr i atann ali déssi l’ké. Son pti shien té pa la. Kan li la domann son gromèr nouvèl son shien, son gromèr la pa réponn, solman gro larm dolo la sort dann son zié.

Lo tan la passé, Olivier la pa ronons rotourn son péi. Tardra, viendra, lo zour v’arivé... Mazine in pé si son pti shien i atann ali la-ba, pétète. I koné pa sa, avèk la vi koméla.

NB : Kamarad lo Port, mi pans i fo rod in pti shien pou li. Dann Chagos la-ba, ti shien-la va grandi.

Justin