Metyserver - Alor rakont anou koman ou la rankont out madame ?
André Hoarau - Ma fame i vien de Peterboth. Donk èl té rèss Peterboth. Ansiènman, mé paran, té falé rod la tèr partou pou travayé. Nou la parti à in térin i apélé Grantilèt, plu ba de Peterboth. Alor nou la parti travay laba. E ma fame lété laba, èl lavé dé sèr, dé sèr té ansanm. Té zèn, té bien pomé kan té zèn. Alor, ma vièy maman, té di amoin : « André, nana dé zoli fiy i pass, toué voi lé dé fiy i pass là », mi di aèl sé dé bèl fiy. Nou la komans fèr in ti pé la kour, marsh in ti pé o koté, ésèy sa, koz in ti pé ansanm, n’i voi i voulé.
Kan la vouli apré, nou la fé bann ti bal, lé bal maron, ke i dansé inn dizèn pèrsone apepré dan. Là, n’i parté, nou té danss ansanm, mé té falé vèy la moman, i falé pa i koz tro ansanm, i falé pa tro toushé, la moman i défandé. A partir de là, la kontinié kome sa, apré nou la fiyansé. La fali fiyansé ; kan la fiyansé, la fé le fiyansay.
Ariv Peterboth, nou la rod in mesië ki gingn bien kozé. Kan i ariv laba, i rant anndan. Le mesië, kan i ariv laba, i di « monsieur et madame untel vous n’êtes pas ignorés jordu. Pourquoi nous la venu ici ? ». I di « parss nou la venu isi de la par de Vwaro André po demann la min de vot fiy an mariaz ». Tout la bann, lé paran i di voui sava, vien, là i fé la demann, i koz, i demann tou lé konbienn tan i pé venir à lamour, i di tou lé kinz zour. Tou lé kinz zour, nou lé a lamour. Alor tou lé kinz zour nou parté à lamour. I falé prann in ti paké de bonbon pou porté pou done la fiyansé kan i ariv laba. Pou rantré, i falé pa rantré lé dë bra vid. N’i porté le paké de bonbon, là i doné à la fiyansé, là i rantré n’i asiz. Alor, n’i asiz in ti pé distansé, i falé pa asiz o koté. Si sété le papa, té la moman ki véyé. I véyé, alor i gagné pa tro kozé. I toushé pa, i défandé de toushé. Alor la fiy i asiz a koté, nou lé in koté, alor i kozé, trè pë de kozé. I resté ziska sink èr é demi, si zèr. Apré dizuit èr, mi resorté de Peterboth, mi monté Silaos le soir a pié ; a ! té difisil. Té difisil po trouv inn fiy à marié.

M. - Té in anbètman là, si ou té gingn pa toushé ni kozé ?
A.H - Parl pa si té anbètman. Oufou, bé ! té komsa, lé paran té sérië , té difisil, i falé pa toushé.

M. - La bien fali in moman v’i té toush in ti pë !
A.H - Ou ! sé vréman an kashèt. Kan èl i sorté komsa, na dé foi la moman i resté in ti pé dérièr, in pé à lékar, nou parté in ti pé devan, là nou gagné toush inn ti mièt. Mé otreman de sa, i gagné pa. A ! non, té difisil le tan de lontan. Té difisil. Lé pi kome koméla. Koméla, lé an gaspiy koméla. Koméla, na tro.

à visionner sur www.dailymotion.com/metyserver

Lexique

pomé : bien faite, aux seins arrondis
sava (partir) lamour : aller faire sa cour (amoureuse)
sérië : sérieux, sévères