I tard pa, i sava diskit déssi lo RSA. Mi antann dir, sak i gingn lo rémi, avèk lo RSA, li va gingn dé san euro an plis. Kisa va di li vé pa ? A moin k’li nana kankrola dann son tète... Tout fason, i sa pa donn lo droi rofizé. Si ou i rofiz, i raz aou a-sèk, i tir out tète... fason pou kozé.
Solman nana in n’afèr l’apré travay amoin ! Lo moun i gingn RMI, i pèy pa linpo déssi la kaz, z’inpo télé, i apèrsoi la CMU konplémantèr san péyé, plis ankor d’ot zafèr la pa bézoin détayé. Dakor ! Mé si li gingn dé san euro an plis, kosa li lé riskab pèrd ? Sak li pèy pa zordi, li va pèy domin ? Sak li gingn zordi, dann lavnir, li gingn ar pi ? Si lé vré, sof lintélizans lo moun la trouv sa, pou moin pèrsonèl, son léspri lé kourt pou arpran avèk in min sak la donn avèk l’ot !
Moin na in dalon la pa invant zèf bouyi, i di amoin konmsa k’i fo pa fié déssi l’intélizans in pé, akoz sa lé bordé avèk la kouyonis. Kan ou i kroi ou lé dann inn, ou la fine tonm dan l’ot, kan ou i kroi ou lé dann lintélizans, ou la fine tonm dan la kouyonis, bèrné d’dan ! Mon dalon, sé in gran filozof ! Mé so kou issi, lé inpossib kroir lé vré, si tèlman k’lé bète !

Justin